राजकुमार कार्की
असार २९ ।
ओखलढुंगा जिल्ला मोलुङ्ग गाउँपालिका–२ मा पर्ने पहिरे खोलाको कथा यो वर्ष पनि
शुरु भएको छ । हरेक वर्ष वर्षाको समयमा शुरु हुने पहिरेको कथा यो वर्ष पनि
दोहोरिएको हो । प्रत्येक वर्ष पहिरेको कथा
फेरिने आशामा रहेका यहाँका नागरिकहरुको ‘आशा’ आशामा मात्रै सिमित रहेको थुप्रै वर्ष भइसक्यो । खोलामा पानी हुदैन, पानी नपरेको समयमा
हिडडुल गर्न समस्या छैन, तर कतिखेर पानी पर्छ टुंगो पनि हुँदैन । पानी पर्ने बित्तिक्कै वारिको
वारि नै पारिको पारि नै बस्नुपर्ने अवस्था छ ।
आकाशबाट पानी
पर्नासाथ ढुंगा, मुढा, माटोको लेदो आई यातायातका साधन लगायत मान्छेहरु वारपार गर्न सक्दैनन् । यो
क्रम करिब असार महिना देखि असोज महिना सम्म निरन्तर चलीरहन्छ । लेदोले यातायातका
साधन लगायत बाटो हिड्ने बटुवालाई रोक्न
थाले पछि यसको कथा शुरु हुन्छ । र हिउँद लागेर पानी पर्न छोडेपछि यसको कथा सेलाउदै
जान्छ । हिउँदको समयमा एक थोपा पानी पनि हुदैन भने वर्षाको समयमा पनि ढुंगामाटोको
लेदो मात्रै बगीरहन्छ । पानी नपरेको बेलामा समान्य सानो पानी मात्र झरेको हुन्छ
केहि समस्या हुँदैन । गतवर्ष मोलुङ गाउँपालिकाले तलबाट जाली वाल लगाएपछि केहि
रोकीएको थियो । तर यो वर्ष त्यो जाली वाल सबै बगाएको छ ।
यो सडक भएर जिल्लाका
५ वटा स्थानीय तहका नागरिकहरु जिल्ला सदरमुकाम आउनु पर्छ, भने मोलुङ गाउँपालिकाका नागरिक र खिजीदेम्बाका केहि
वडाका नगारिक भने सदरमुकाम लगायत राजधानी काठमाण्डौ र तराईका जिल्लाहरुमा आवतजावत गर्नुपर्ने बाध्यता रहेको छ । मोलुङ
गाउँपालिका, खिजीदेम्बा गाउँपालिका, लिखु गाउँपालिका, चम्पादेवी गाउँपालिका
र सुनकोशी गाउँपालिकाका २ वटा वडाका नागरिकहरु यो सडकको प्रयोग गर्नु पर्ने
बाध्यता रहेको छ । खिजीदेम्बा र लिखु गाउँपालिकाले बैकल्पीक सडकको रुपमा रामेछापका
विभिन्न सडकहरु प्रयोग गर्दै सदरमुकाम आउने गरेका छन् । मोलुङका नागरिक र चम्पादेवीका अधिकाँस नागरिकले
यो सडक प्रयोगको बिकल्प छैन । रामेछापको मन्थली हुदै खुरकोटको सडक प्रयोग गरेर
सदरमुकाम आउने खिजीदेम्बा र लिखुका नागरिकलाई करिब दुइ दिन लाग्ने गरेको छ । ढाडे, सिरिसे, सालु देउराली मन्थली, खुर्काेट हुँदै
सदरमुकाम आउनेहरुलाई एक दिनमा आइपुग्ने संभावना रहन्छ । उहाँहरु खुर्काेट आएर
काठमाण्डौबाट आएका सवारी साधन प्रयोग गर्नुपर्ने हुन्छ । यदि खुर्काेटमा
काठमाण्डौबाट आउने सवारीसाधन नेभेटेको खण्डमा एक दिन त्यहि बस्नु पर्ने हुन्छ ।
खिजीदेम्बाका नागरिकहरु भने बेलुका खुर्कोट बास बसेर भोलीपल्ट काठमाण्डौबाट आएको
सवारीसाधन प्रयोग गरी आवतजावत गरिरहेका छन् ।
मोलुङ्ग
गाउँपालिकाबाट प्रत्येक दिन काठमाण्डौका लागी विहान बस छुट्ने गरेको छ भने अन्य
साना गाडीहरु पनि प्राय दिनभरी नै सन्चालन भईरहेका हुन्छन् । प्रदेश राजधानी
विराटनगर लगायत तराईका अन्य जिल्लाहरुका लागि पनि सवारीका साधनहरु यहि सडक भएर
आवतजावत गर्नुपर्ने बाध्यता रहेको छ ।
सडक अबरोध भएको
बेलामा सिद्धिचरण नगरपालिकाले जेसिभी प्रयोग गरि सडक सन्चालनमा सहयोग गर्दै अएको छ
। भने मोलुङ गाउँपालिकाले मर्मत गर्दै सडक सन्चालन गरिरहेको छ । पुल निर्माणका
लागि ठेक्का लागिसकेकाले ठेकेदार कम्पनीले एउटा मेसिन राखेर काम गर्दा सजिलो हुने
हुँदा त्यसको पहल भईरहेको मोलुङ गाउँपालिकाका अध्यक्ष उत्तम राईले बताउनुभयो ।
पहिरे खोलामा पुल निर्माणको लागि ठेक्का यति निर्माण सेवा सोल दुधकुण्डले पाइसकेको छ ।
सम्झौता हुन बाँकी भएकाले सम्झौताको लागि पत्र पठाईसकिएको पूर्वाधार विकास
कार्यालयका सब इन्जिनियर पदम जिरेलले जानकारी दिनुभयो । दुई वर्ष भित्रमा सम्पन्न
गर्ने गरी ३ करोड ७२ लाख ६६ हजार ७६८ रुपैँयामा ठेक्का लागेको सब इन्जिनियर
जिरेलले जानकारी दिनुभयो ।
